قيل: " الفرق بين الحق و الباطل مقدار أربع أصابع"، و هي المسافة الفاصلة بين العين و الأذن، بس لما الواحد بيشوف الباطل و بيسمع الباطل شو بدو يعمل ؟؟؟ يعني اللي عمنشوفو و عمنسمعو ما بينزل لا بميزان و لا بقبان !!؟؟؟ ... مفارقات من كل الاشكال و الألوان ... و هون رح حاول اني حط بعض المفارقات اللي دائما بتزعجني ..
مفارقة1: لما البنت بنت بتسافر لتشتغل فهي خارجة عن المألوف .. لأنو البنت ما الها غير بيت جوزها .. و ما بيصير يكون عندها طموح ...
بس لما الشب يسافر، فهو شخص قبضاي، عميحاول يبني مستقبلو و يحقق طموحو ....
مفارقة2: لما البنت بتكون بالغربة، إذا طلعت مشوار مع حدا فهي فلتانة و ما عندها أخلاق، يعني مهما حست بالغربة و بحاجة لإنها تحكي مع حدا ضمن اي اطار منطقي بعيد كل البعد عن اي نوايا سيئة فلازم تنكتم و تنقبر و أكتر ما فيها تعمل انها تحضر اوبرا وينفري و دكتور فيل على ام بي سي 4 ...
بس لما الشب يكون بالغربة، و بيصير يعمل السبعة و ذمتها و ما يوفر حدا، يعني حرام، الزلمة ضايق خلقو و حاسس بالغربة و الوحدة و لازم يفرغ طاقاتو الكامنة ... انو يعني لو كان ببلدو كان عمل هيك !!!!
مفارقة3: لما البنت بيفشل زواجها و بتنفصل عن زوجها لأي سبب كان، يا حزركن شو أول كلمة بتنقال عنها: "أبصر ليش اتطلقت" انو يعني ما بيكون الحق غير على البنت "المرأة" ؟؟!!!؟؟ انو يعني يعني اذا زوجها كان ابن حرام ضروري هي تتحمل ؟؟؟
بس لما الرجل يطلق ... بيصير ضحية من ضحايا المجتمع .. انو حرام .. مرتو ما جابتلو ولاد و نكدت عليه عيشتو ... الله يعينو ....
مفارقة4: عطفاً على المفارقة السابقة ... لما المرأة بتكون مطلقة، فهي هدف لكل المحاولات الدنيئة لاصطيادها ... لأنها طريدة دسمة من مبدأ انها مطلقة و وحدانية و بدها حنان ، و اذا طلعت مشوار الله يستر، و اذا حكت مع حدا يا لطيف، انو يعني ضروري تقبر حالها بالحيا ؟؟؟
بس لما الرجل بيكون مطلق، فهو من حقو انو ينطلق و يبحث عن حب جديد، حرام خلوه يعبي فراغو العاطفي.
مفارقة5: لما المرأة "بتطلع" مع حدا خارج اطار الزواج (و كلمة بتطلع تتحمل أوجه عديدة يعني يمكن مشوار و يمكن أكتر) فهي (مع كامل احترامي) ساقطة بنظر الشريحة العظمى ...
بس لما الرجل بيطلع مع دزينة من النساء خارج اي اطار، فهو ذكر (يعني قبضاي) .. و الرجولة منه براء ...
انو يعني ليش ما عمنقدر نستوعب فكرة المرأة نصف المجتمع، و انو متل ما للرجل لازم يكون للمرأة، انو ليش دائما منقول في شرق و في غرب، ليش ما منقدر نفهم انو هالموضوع نسبي، يعني اذا قلنا عن شخص انو من الحسكة فهو من الشرق، و اذا كان من اللاذقية فهو من الغرب ؟؟ يعني هالشي خلاه متحرر يا ترى ؟؟ او لما نقول هالشخص من ألمانيا الشرقية و التاني من المانيا الغربية فهل تغير شي ؟؟؟ لهيك الموضوع نسبي بحت بس مع الاسف .. الله يرحمك يا آينشتاين ... يا ريتك فهمتنا النظرية النسبية بهالخصوص ..
يعني لازم نتذكر دائما انو متل ما في عظماء بالتاريخ ... كمان في عظيمات، و انو متل ما الله خلق الرجل كمان خلق المرأة ....
طبعا قائمة المفارقات تطول و هالمرة كانت لصالح المرأة لأني بؤمن انها بحاجة للدعم، و بتمنى يجي اليوم اللي نعيش فيه نوع من المساواة ...
و قبل ما خلص لهاليوم .. حبيت ضيف مفارقة أخيرة و لكن محرجة للغاية .. بس لازم الواحد يكون شفاف مع نفسو .... ألا و هي:
.
.
.
.
.
.
مفارقة: انو انا هلق عمبحكي هيك، بس يا ترى في حال وقعت بدوامة هالمفارقات على أي جانب بدي وقف ؟؟؟
بتمنى انو ما حدا يسألني ...
و للحديث بقية ...
و للحديث بقية ...
